doris 發表於 2017-10-19 17:15:01

【台中西屯】【食記】名粵軒港式飲茶餐廳

名粵軒港式飲茶餐廳,穿越時空返左香港食食食!
店名:名粵軒港式飲茶餐廳地址:台中市西屯區國安一路168號電話:04 2462 1333營業時間:11:30-15:00,17:30-22:00用餐日期:2017年10月

住得台中耐嘅香港人,可能多少已經有啲Homesick,特別可能就係對香港嘅食物喇~但台中嘅港食係咪真係OK架?小肥妹今日就幫你試一試佢!

名粵軒位於一個叫M Square米平方商場入面,
M Square係一個好多餐廳嘅商場,所以開車嘅朋友停車方面唔洗擔心,就算停車場無位,附近都好多位停車架。
以下係名粵軒餐牌嘅參考:
https://www.facebook.com/pg/mingyuexuan2016/photos/?tab=album&album_id=877939392342049

係我地點餐果時,有個識講廣東話嘅姐姐就開始同我地講野,原來佢係呢度嘅事頭婆。
咁佢就介紹我地好多唔同嘅野食,仲好強調話係香港師傅香港人開架,所以會似返香港口味咁話。咁就等我一樣一樣黎介紹小肥妹究竟食左啲咩落肚啦。 首先事頭婆就送左兩個前菜黎先,一個係「陳醋醃蘿蔔」,一個係「黃金泡菜」,呢兩個都好開胃,偏向台式。黃金泡菜同一般我地食嘅韓式泡菜口味上有啲唔同,佢係辣腐乳去醃嘅。


點心方面我地叫左最基本嘅「晶瑩鮮筍蝦餃皇」同「蝦籽蒸燒賣」,
最能試出點心師傅嘅真功夫。
我覺得佢個蝦餃同燒賣都做得好似香港口味,兩樣野入面都有滿滿嘅蝦,同時整體唔會好鬆散,保持到佢扎實嘅口感。合格。


廣東人四寶係咩呀?粥、粉、麵、飯。咁我地今次唔係好多人食就叫左粥、粉、麵,無叫到飯,有「生滾皮蛋瘦肉粥」、「乾炒牛河」同「港式牛筋腩撈麵」。皮蛋瘦肉粥,個粥底好棉,似返香港嘅粥,皮蛋唔會好似某啲舖頭有一股腥味,比較特別嘅係瘦肉部分,出面通常都係用切嘅一條條肉條或者肉片,但呢度係手撕嘅瘦肉絲。淨係計肉絲方面已經值得食呢個粥。乾炒牛河,個河粉始終唔似香港果隻河粉,可能真係無貨源啦,我係呢邊真係未吃到似香港果隻河粉。港式牛筋腩撈麵,個牛腩夠稔,唔會太碎,而且個麵都唔會一舊舊咁,腩汁味夠。合格。


燒臘方面,我地叫左「港式明爐燒鴨」,燒鴨個皮夠薄夠香,唔會有一舊肥膏痴住,鴨肉都係好食,唔會韌同柴,都算滑嘅。小肥妹最鍾意就係個酸梅醬,食燒鴨梗係要配酸梅醬架啦!可惜當日無燒肉,事頭婆話佢地燒肉正架,似足香港,叫我地下次去一定要試咁話。



海鮮呢,我地就嗌左「頭抽生煎活蝦」同事頭婆推薦嘅「清蒸老虎斑魚」,頭抽生煎活蝦黎到個賣相好好,食落有美極味,我最鍾意就係食呢個蝦蝦,夠香口惹味,個殼又易剝,唔洗整污糟隻手留一手蝦味。清蒸老虎斑,一上枱果下都好似香港酒樓上魚咁,同埋條魚都係游水魚,唔係急凍死魚,所以都新鮮嘅。清蒸黎講,都唔算好嚡,雖然係養魚但都唔錯,合格啦。


唯一覺得麻麻地就係個菜,「金銀蛋浸香港芥蘭」。芥蘭本身無問題,出係個金銀蛋身上,整得太濃味唔夠清,仲有啲濁,唔係我地想像中果個金銀蛋。


最後事頭婆都有送我地一人一個甜品,有「楊枝金露」、「香芋西米露」同「香芒凍布丁」。呃,全部都一般般啦,但係送嘅話就唔好要求咁多。


總括黎講,啲野食都似返香港,係有解到個Homesick。許願希望小肥妹有得繼續食好西先有得繼續同大家分享好味快訊啦!
頁: [1]
查看完整版本: 【台中西屯】【食記】名粵軒港式飲茶餐廳