真係有心理準備遠嫁台灣？

我係一個香港遠嫁黎台灣嘅新抱仔，其實嫁過黎真係百般滋味在心頭。
我而家諗返轉頭真係覺得自己點解咁有勇氣嫁一個傳統嘅台灣人。
如果你係準備為愛走天涯嘅話，真係要三思而後行。

首先我認為你可以上網參考下一啲台灣新抱打嘅文章先，
睇一啲台灣本土嘅新抱去講究竟奶奶果家人有啲咩唔好，
咁大概你心入面就有個底，因為你本人都可能會發生呢啲情況。

其實無論香港定台灣，會有婆媳問題嘅最最最大成因，都係因為你有個「豬隊友」。
豬隊友顧名思義就係講緊個老公，因為你同一個異國奶奶溝通嘅橋樑最重要就係你老公。
而我同我認識身邊嘅香港新抱仔都認為，
台灣人老公真係唔係好識去夾係你同佢呀媽或者其他屋企人之間嘅一條橋。

我自己都有好多次比豬隊友跣到攤攤腰嘅情況，今次就講住一個我覺得最哭笑不得嘅事先。

結婚你千其唔好覺得咁瀟灑係兩個人嘅事，通常都係兩家人嘅事。
我嘅屋企人係好開放，亦都比我好多自由，但男方果邊就係好傳統仲住緊三合院嘅老一輩。

而我同我老公結婚果時都發生左好多野，當準備話要結婚果時，
男方屋企人第一時間就問我屋企人要幾多聘金，然後問都唔問就第一時間拎生日八字去對，話睇下邊日結婚好。
之後好快男方家人就好快自己決定左我同我老公要邊日結婚、係邊度擺酒、擺幾多圍之類，係完全問都無問過我。

跟住之後係我屋企人自己急急腳訂機票民宿，我先叫有地方「出嫁」。
我果時真係感覺我好似比人賣豬仔咁，因為原來所有野都唔係我決定，
我根本唔知我究竟係古代比人賣女做童養媳定係結婚，
不論婚紗禮服、擺酒菜色、買咩嫁女餅、什至連我當日個妝，我都無任何可以決定嘅權利。 

但台灣老公到呢個時刻仲可以講一句「隨便」、「無所謂」，我就真係灰晒心。

到台灣擺完酒，我屋企人黎參與完，睇唔過眼決定係香港擺多次，
因為我都有自己嘅朋友同親戚，我媽直頭話唔可以好似「盲婚啞嫁」咁嫁左。
而今次香港擺酒，我地一決定就即刻同我老公講，同邀請佢屋企人一齊黎參與，
想幫佢地訂機票同酒店，同幫佢地一齊去整Passport，畢竟佢地全家都未出過國。
提出完之後，男方屋企人就話考慮下先未必去，最激心嘅係連我本人個老公都話唔想去。
到最後真係嘈到要即刻離婚，佢屋企人同我老公先勉為其難黎香港飲。

係黎香港飲呢個過程，我奶奶老爺就做左「百齡罈」，
呢樣彈話唔好、果樣又彈話唔好，又話坐個飛機辛苦、我地做咩搞咁多野、話咩都唔係佢地話事、唔習慣住酒店、香港坐車又辛苦等等，
我老公就一味識「是但」。我果時真係覺得自己委屈到一個點，
但後來我發現原來佢地個文化就係咁。

我亦都有一個中學同學下嫁台灣，同我差唔多情況。
不過佢仲慘過我，佢連Passport都比奶奶沒收埋，唔準返香港，
就咁就係台灣「盲婚啞嫁」左，連佢自己係香港嘅朋友都無辦法係佢結婚當天祝賀佢一句「百年好合」。

當然，唔係每個台灣家庭都係咁，我只係一個參考用例子。
奉勸大家如果決定要遠嫁黎台灣，真係要好好同你嘅男朋友溝通，
深入認識對方屋企人、環境同文化，先好作決定。

多情自古空餘恨，好夢由來最易醒。

有好多野自己決定左，就要自己承擔後果。