台灣最美麗嘅風景係「人」？

小肥妹我都係台灣大大話話住左六年。
六年，話長唔長，話短唔短。
我係呢度都認識左好多朋友，有好多美好嘅回憶，
當然都有一啲唔開心嘅經歷。

唔開心嘅經歷

唔開心嘅經歷大部分都係工作上嘅不愉快，
我係台灣都打過唔少工，先發現呢度原來工作風氣係非常之唔好，
台灣大老闆永遠覺得員工可以再做多啲啲。
我之前做有一間集團式公司，時間上返20:00－5:00，一個月有六日假期，
我一開始入去果時底薪23,000，加埋全勤、績效獎金等等36,000。
愈來愈就覺得呢間公司好奇怪，因為每日起碼超時工作一小時以上，
而無任何加班費，然後每個月固定有一日要提早返3個鐘大清潔，
而呢3個鐘都係無任何加班費。
每日大家都要開會本來係一件好正面嘅活動，
但全部人返夜晚半夜嘅員工，就要配合公司執行長係晏晝一點開兩個鐘會，
如果唔去開會，就扣錢，
就連急症、住院都要扣錢。

然後，如果公司我地果間分店業績唔到執行長嘅標準，
就開始扣假期，店長副店長本身都只有三日假期，
但好多時都會被扣到無。員工亦然。
公司都比好多假象你，例如你每晏晝三點到五點去上堂就加3,000當月津貼。
上果啲堂都係一啲洗腦課程，將啲幹部講到幾努力賺幾多咁，
講來講去都係啲廢話。
你諗下咁樣根本完全無私人時間，成為公司嘅奴隸。
 

再加上公司積極推祟高層，高層郁啲都可以扣員工人工，
令到啲員工變晒狗咁，淨係識擦鞋。
所以到我離開呢間公司嘅時候都比人扣左好多錢，
付出嘅勞力同人工唔成正比，真係令我對台灣公司十分之心灰，
覺得係台灣打工真係被剝削得好嚴重。

慶幸嘅事情 

可能你成日都聽到「台灣最美麗嘅風景係人」呢句說話，
呢份「人情味」對遊客留底深刻嘅印象外，
其實生活係度嘅人都可以深深體會到。
 

除左一啲生活上陌生人幫助嘅小事之外，
我覺得「朋友」之間嘅相處都係同香港有所差別，
我身邊嘅台灣朋友好容易相信人，真係唔知話佢地蠢定單純。
但同時佢地都好願意去幫人，特別係我呢個「非台灣人」，
所以我覺得同台灣人相處係好放鬆嘅。
唔會有咁多嘅機心同算謀，係香港可能好多人都笑裡藏刀你睇唔出，
但呢度啲人真係唔係好識講大話，佢一講大話你就睇得出。
 

所以我大學年代同學，到之後做野嘅同事，
都同我可以KEEP到一段真摰嘅友誼，
反而我自己小學中學嘅同學都已經無聯絡，
我覺得人與人之間嘅相處真係同香港差別好大。

因為空間同時間嘅問題，香港可能無咁多空間同心思去正視朋友之間嘅「友誼」，
呢一份友誼可以達到咩程度等等。
可能因為我係情緒比較敏感嘅巨蟹座，
所以覺得好多台灣朋友都好貼心，比較容易知道我嘅需要。

人之相識，貴在相知，人之相知，貴在知心。

每個地方其實都有「好人」同「壞人」，只係睇下你遇到嘅係咩人、有無運氣。
所以我唔會話台灣係一個「好地方」，
但以我住左呢幾年黎講，我覺得係一個「適合」我嘅地方。
幫過我感動過我嘅人實在太多，我都好慶幸遇到好多好人，
對我黎講，台灣最美麗嘅風景真係「人」。