【台中南屯】【食記】椰林世界椰子雞跨界鍋物餐廳
本帖最後由 doris 於 2017-10-19 11:49 編輯【台中南屯】【食記】椰林世界椰子雞跨界鍋物餐廳，港人都比爆LIKE！
今晚小肥妹嘅一班大老細又要帶我黎食好西增肥喇，
因為最近小肥妹有小小病嘅關係，所以就黎食開左無幾耐嘅椰子雞黎補補佢！
（COPYFROM 椰林世界FACEBOOK）
店名：椰林世界椰子雞跨界鍋物餐廳地址：台中市南屯區公益路二段818號電話：042258 0199營業時間：11:30–14:3017:30–22:30用餐日期：2017年10月
今晚小肥妹嘅一班大老細又要帶我黎食好西增肥喇，
因為最近小肥妹有小小病嘅關係，所以就黎食開左無幾耐嘅椰子雞黎補補佢！
呢間係公益路嘅新餐廳，係正試營運嘅Rich Mall 對面。除左觀感上好大間，入面空間感都好夠，岩晒需要空間去放鬆食餐飯嘅香港人，亦都好適合一家大細、一大班好朋友黎食飯。
以下係椰林世界椰子雞嘅 Facebook餐牌，比大家參考下有咩食同價錢大概係幾多：https://www.facebook.com/coconutforest/menu/
湯底方面，我地今日想食清清地就嗌左佢地嘅招牌湯底－椰林椰子雞鍋。湯底費：NT 100 /人，鴛鴦鍋就 NT 150 /人。椰林椰子雞鍋係用椰子水同一啲椰肉去煮嘅一個清甜嘅湯底，一開始上可以飲一碗湯先，之後煮左好多野落去就唔好飲喇，畢竟邊爐湯都係唔係太健康。
一開始佢就送左一杯仔椰子水黎，上面係粒好酸嘅蕃茄仔，都OK嘅，開開胃咁。
跟住好快咁就嗌左一堆野，最主要梗係「放山雞」啦！所以我地無叫到套餐，選擇散嗌，咁樣選擇感高啲，亦都唔會有啲唔想食嘅野。然後最特別竟然有雞子可以嗌！小肥妹表示真係無見過台灣嘅火鍋店有雞子！通常都係麻油雞子。係要返香港火鍋店先會有得雞子打邊爐。所以我地最後都嗌左個「心肝寶貝」黎試下，顧名思義，就係有「雞心」、「雞肝」同「雞嘅寶貝」啦嘻嘻嘻～
話咁快啲野就上晒黎喇，我地有叫左啲丸啦同菜，丸類包括有：
「水晶餃」、「松子豬肉丸」、「手工牛肉丸」、「手工鮮蝦丸」同「手工花枝丸」我地一致都覺得啲丸類麻麻，唔係咁特別同唔夠彈。然後啲配料蔬菜類就叫左：「凍豆腐」、「竹笙」、「日本山藥」、「白蘿蔔」、「綜合蔬菜盤」同「綜合鮮菇盤」
啲放山雞到左，我地梗係煮左啲雞食左一轉先啦。個服務員會幫你落雞，冚蓋，計時，差唔多五分鐘就會有雞食喇～～～
放山雞肉食落都係新鮮雞，所以無雪味，同埋會有一股好健康嘅氣息，岩晒平時都唔係幾健康嘅小肥妹。而有一個特別嘅點就係佢會附一個沙薑粉比你點，好少台灣火鍋店會有沙薑粉呢個項目，點完之後真係有食得出香港嘅味道呀！
你地睇下我地食左好多雞呀！淨返晒啲雞骨。掘柑掘桔掘金桔，掘雞掘骨掘龜骨，掘完雞骨掘金桔，掘完龜骨掘雞骨。係香港人嘅話就大家黎讀一次啦！
之後我仲有嗌左兩個飯飯黎試，因為呢度啲「土鍋煲飯」都係招牌黎，即係我地嘅放大版煲仔飯。我地叫左「招牌臘味」同「椰林蕈菇」兩個口味黎試。
我地試左個「招牌臘味」先，入面有臘腸、潤腸、臘肉同大甲芋頭，個飯好香同有飯焦，小肥妹最鐘意就係食煲仔飯入面嘅飯焦架喇，我覺得最點精就係啲芋頭，完全可以帶出成個飯嘅香氣，同埋加埋啲蔥，食落都唔係咁油膩。
然後就係個「椰林蕈菇」，入面有唔同嘅菇類、栗子同四季豆，我地本來以為呢個會係一個比較養身清淡嘅口味，點知原來佢加左XO醬，變得好惹味，有少少辣咁，真係吃多多碗都得呀！飯加左栗子呢個角色都好特別，提升左成個飯嘅吸引程度。
本當我地諗住拍拍蘿柚走人嘅時候，店家竟然係有送甜品嘅，係一個「椰子糕」。然後意想不到佢都幾好食，唔會話好甜好甜咁。
總括黎講，我地都覺得呢間椰子雞好適合香港人口味，亦唔會太重口味有啲人接受唔到，適合唔同年齡層嘅人。肉材品質都好OK，特別係個飯真係好好食啊呀！
真係港人都比爆LIKE呀！
頁:
[1]