開啟輔助訪問
 找回密碼
 立即註冊

Sign in with facebook

Connect with friends.

樂活台灣網 首頁 台灣生活 港人港商 查看內容
分享到:

金悅軒,台中頂級粵菜。

2017-11-13 17:03| 發佈者: doris| 查看: 2709| 評論: 1

摘要: 呢間係台中最似樣嘅一間粵菜,同埋大廚識講廣東話,所以一定要黎食啊。





金悅軒,終於有秋蟹食。



金悅軒 旗艦店
地址:台中市南屯區公益路二段213號
電話:04 2255 7942
營業時間:11:30-15:00,17:30-22:00
用餐日期:2017年10月




金悅軒可以話係一班大老細係台中嘅飯堂,所以小肥妹今日又跟黎食飯喇!因為佢地話呢間係台中最似樣嘅一間粵菜,同埋大廚識講廣東話所以大老細們都好鍾意黎食。雖然金悅軒本身有自己嘅停車場,但隔離都有個好大嘅特約停車場,泊車完全唔成問題。



因為燒臘8點半就無嘅關係,所以我地就叫左燒臘先,有「乳豬拼燒鴨」同「燒腩仔」。台中真係好少有香港乳豬,就算有都會有少少唔同,但呢度做得都似嘅。而燒鴨個皮都夠薄,鴨都唔會好肥,因為我其實唔係咁鍾意食果啲黃色肥膏。放係隔離啲海蜇雖然同香港唔似,不過都幾好食。燒腩仔我食過好多間個皮都唔係脆嘅,但呢度都可以叫係層層分明同脆。


我地仲有叫左台中少有嘅「燒乳鴿」,真係未係台灣見到有乳鴿,可能因為台灣人唔係好敢食,因為我之前同過台灣人講香港會食乳鴿呢樣野,個個都好驚訝咁,覺得香港人做咩咁恐怖食雀仔咁。金悅軒嘅乳鴿唔算太有肉,不過都OK嘅。


然後登登登登登,今日嘅主角之一「波士頓龍蝦泡飯」!小肥妹已經許願要食龍蝦好耐架喇,終於食到喇。呢個波士頓龍蝦泡飯,龍蝦、湯同啲飯係分開嘅,因為佢要到食果時先煮埋一齊。咁樣嘅用意係因為個飯係炸飯同普通飯溝埋,所以食落個泡飯先有脆米嘅口感。


今日嘅主角之二就係大大條嘅「紅燒火腩龍虎斑」,入面都幾多火腩、枝竹同冬菇,條魚大大條但食落都唔係嚡嘅。


今日嘅主角之三就係當造嘅「大閘蟹」,你睇幾大隻,幾多膏~係咪好吸引呢!同埋呢邊啲大閘蟹都唔會苦,小肥妹比LIKE呀!


牛方面,我地嗌左「乾煎蒜片牛柳粒」同「清湯蘿蔔牛腩」,牛柳粒唔會過熟,所以香口得黎都好稔,好Juicy。而清湯蘿蔔牛腩入面嘅牛腩雖然一片片,但又無碎,同牛柳粒一樣,炆得好稔,唔會有好多渣渣。蘿蔔清清甜甜都好適用解油膩呀。


蝦蝦方面,就有「XO醬海蝦粉絲煲」同「XO醬蝦球炒麵」,兩款個味都OK。海蝦粉絲煲入邊啲粉絲非常之入味,所以好好食呀!蝦球炒麵入邊我本來無諗住唔會有咁多粒蝦球,點知佢入面原來隱藏左好多神秘蝦球係度。


蔬菜類嘅菜色我地會叫得比較多,因為食咁多肉都會好滯,要搵啲蔬菜平衡返。有「翅湯浸津白」、「蟹肉扒西蘭花」、「金銀蛋浸絲瓜」、翠芹鮮百合炒山藥」同「蒜蓉炒芥蘭」。翅湯浸津白,個翅湯有啲似雞湯味,而津白好甜,可以一食再食。蟹肉扒西蘭花係老細至愛,我都好鍾意上面果堆蟹肉,小肥妹對蟹真係情有獨鍾。金銀蛋浸絲瓜,金銀蛋夠香,個絲瓜都好甜,台灣嘅絲瓜同香港會有少少唔同,如果你係要食香港絲瓜嘅話,係呢度係叫「角瓜」。翠芹鮮百合炒山藥,呢個普普通通,無咩特別,因為小肥妹係唔食西芹嘅。


跟住就係好好好似香港嘅「干燒伊麵」,干燒伊麵真係唔可以台灣蠔油炒出黎,因為會唔同味,但呢個係用香港蠔油炒出黎,所以真係好好好似香港架!仲有一個「三蝦炒飯」,用海蝦、蝦乾同蝦膏去炒,一上到黎勁香,因為小肥妹從細細個就好鍾意食蝦乾嘅關係,所以覺得呢個夠乾身又香,好值得食呀。


最後我地用一個奶黃流沙飽作為甜品結束,奶黃流沙飽真係夠流沙,熱辣辣襯熱食最好食,入面仲有鹹蛋香,似足香港。


小肥妹要繼續許願食更多野,終有一日會變大肥妹架喇!



分享到:
相關閱讀

Facebook請即讚好樂活台灣網」及加入群組: 移民台灣香港人資訊分享 | 香港人美食旅遊推介
台灣香港人商店: 北部 | 中部 | 南部 | 東部


本站對所有文章的真實性、完整性及立場等,不負任何法律責任。而一切文章內容只代表發文者個人意見,並非本網站之立場。


分享到:
除論壇外一切文章著作權均為"樂活台灣網"所有 台灣資訊大百科 在台港人的最大支援 香港台灣大交流
重要聲明:本網站是以即時上載文章的方式運作,本站對所有文章的真實性、完整性及立場等,不負任何法律責任。而一切文章內容只代表發文者個人意見,並非本網站之立場,用戶不應信賴內容,並應自行判斷內容之真實性。發文者擁有在 樂活台灣網 張貼的文章。 由於本站是受到「即時發表」運作方式所規限,故不能完全監察所有即時文章,若讀者發現有留言出現問題,請聯絡我們。本站有權刪除任何留言及拒絕任何人士發文,同時亦有不刪除文章的權利。切勿撰寫粗言穢語、誹謗、渲染色情暴力或人身攻擊的言論,敬請自律。本網站保留一切法律權利。