港台生B大不同

如果你係香港人嫁去台灣，咁你一定會諗係香港生BB好定台灣生BB好？
係香港生同係台灣生真係好唔同。

健保：

係台灣生你要先睇下你本人有無健保先，無健保去產檢係需要自己比全費嘅，大概NT 600一次到。
仲有另外一啲本來健保就唔包嘅自費產檢，
例如，SMA(脊隨性肌肉委縮症)、母血唐氏症篩檢、妊娠糖尿篩檢等等，加加埋埋都幾甘。
雖然台灣而家可以去衛生所申請新住民嘅檢查補助，但只有檢查有補助，生B都係要自己比嘅。

生B嘅價錢大概好似下面張表咁，你會見到有健保同無健保都差幾遠架！

一般自然產住院為三日，生產手術嘅費用已包含住三日健保病房。
但如果你係香港政府醫院生，產檢到生產基本上都唔會叫你比啲咩錢，最多都係100港紙一日嘅住院費。
如果打無痛，係唔洗任何額外費用，但就未必有得打，一定要撞岩麻醉師有返工又得閒先會幫你打。

產檢質素：

我個人都有分別係台灣同香港產檢過，台灣產檢基本上就你自己決定幾時去就幾時去，
一個月檢幾次都無咩所謂，有健保就最多比下掛號費NT 150左右。
同埋台灣產檢亦細心好多，同次次有得照超聲波，
你就成日睇到肚裡面BB嘅近況、而家咩姿勢、個頭係邊等等。

但如果香港政府醫院呢，雖然唔洗錢，但隔好耐先會排一次產檢比你，
跟住等好耐但又問好快就趕你走，超聲波更加唔洗講，
幾個月先照一次又好快比你睇兩眼就話照完。

所以我都係覺得台灣產檢部分係好啲嘅。

生產過程：

好多台灣人都會選擇提早入院待產，當然要比住院費。
但香港呢通常都係見紅、穿水、作動先會坐的士去醫院，
因為香港政府醫院真係一位難求，你無啲咁嘅情況都係唔會比你入院。
生完之後都係住三日無咩大問題就叫你出院。

而台灣都係醫生幫你接生，但香港政府醫院而家大部分都係助產士幫你接生，非必要醫生都唔得閒理你嘅。
台灣好多都係婦產科度生，醫院都有，但香港就一定係醫院生。
生完除左可以住健保病房呢個選擇，都可以直接轉去月子中心，
台灣有好多生B嘅地方都同月子中心連埋一齊架。

坐月：

坐月係我當初考慮係邊生嘅一個重要因素黎，台灣有幾個方法：

一、 睇下奶奶幫唔幫你坐月，但係就要係一個陌生嘅環境(奶奶屋企/其他親戚屋企)，
         要係最脆弱嘅時刻適應人地屋企嘅生活習慣。

二、坐月中心，好似住酒店房咁，會有月子餐，亦都會有人幫忙照顧BB，生活起居都唔洗自己煩。
        但其實都唔平，要大概NT 6-7000一晚，仲貴過住酒店架。

而香港呢就係：

一、 自己屋企幫忙坐月。

二、 請月嫂返屋企幫忙坐月。

港台坐月大不同

台灣月子餐：有生化湯、薏米飯、麻油豬肝、麻油魚、紅棗水、米酒水代替白開水、麻油豬腰、杜仲茶、麻油雞、花生豬腳等等
                            大多都係用米酒同麻油去進補，香港人未必食得習慣。
                         同埋如果你岩岩生完有產後痔瘡同便秘嘅問題，再食啲咁熱氣進補，真係聽見都辛苦。

香港月子餐：離不開就係豬腳薑、豬潤薑飯，豬腳仲要用陳年老醋浸過一段時間，呢個都係香港嘅傳統，
                         因為我地通常都會派豬腳薑比啲親朋好友。
　　                 同台灣相反，我地比較少用油，盡量唔好食咁重口味，所以港人嘅月子餐真係同台灣好唔同架。

 
同埋如果你係奶奶屋企坐月嘅話，必定會遇到好多問題。

如果夫家係比較傳統，咁佢地就會有好多禁忌，
例如唔可以洗頭、唔可以開冷氣、唔比飲水，一定要用米酒/米酒水去代替水、唔可以出門、什至唔比沖涼掂水等等。
香港都會有，但香港而家開明好多，唔會真係有咁多禁忌，最重要都係唔好病就好。

國籍：

國籍通常都係港人嘅考慮因素之一，如果係想得到香港國籍嘅話，係香港生會比較方便，
因為係香港出生嘅BB一出生就已經得到香港國籍，而之後想取得台灣戶籍只需要驗證一啲文件就可以入戶係台灣。

但如果相反係台灣生而想取得香港籍就要爸爸/媽媽係香港住滿七年而且有永久性居民身份，
要有住七年嘅證明文件例如畢業證書，稅單等等。而香港政府機關嘅流程可能會比較漫長同嚴謹。

所以如果你係想定居台灣，小朋友要有雙重國籍嘅話，就建議係香港生，
拎左香港永久性居民身份證，再去台灣辦手續入戶，可能會比較快捷。

而台灣入戶後亦可申請生育津貼，詳情可以睇以下網址：
https://udn.com/news/story/7272/2634097